மாணவிகளைப் பார்க்க வந்த இளைஞர்களைக் கண்டித்ததால் ஆத்திரம்; பீர் பாட்டில்களில் பெட்ரோல் நிரப்பி வீசியதாக போலீஸ் விசாரணையில் தகவல்

சென்னை: சென்னை நுங்கம்பாக்கம் புஷ்பா நகரில் மாணவிகளைப் பார்க்க வந்த இளைஞர்களைக் கண்டித்ததால் ஏற்பட்ட ஆத்திரத்தில், நள்ளிரவில் பெட்ரோல் குண்டுகள் வீசி வாகனங்களுக்குத் தீ வைத்த சம்பவம் பெரும் பரபரப்பை ஏற்படுத்தியுள்ளது. இந்தச் சம்பவம் தொடர்பாக 5 பேரை போலீஸார் கைது செய்து விசாரணை நடத்தி வருகின்றனர்.

வாகனங்கள் மீது பெட்ரோல் குண்டு வீச்சு

சென்னை நுங்கம்பாக்கம் புஷ்பா நகர், ராமலிங்க வள்ளலார் கோவில் அருகே நேற்று அதிகாலை கார் மற்றும் இருசக்கர வாகனங்கள் தீப்பிடித்து எரிவதாக நுங்கம்பாக்கம் போலீஸாருக்குத் தகவல் கிடைத்தது.

இதையடுத்து சம்பவ இடத்திற்கு விரைந்து சென்ற போலீஸார் விசாரணை மேற்கொண்டனர். தடயவியல் நிபுணர்களும் நேரில் ஆய்வு செய்தனர். அப்போது பீர் பாட்டில்களில் பெட்ரோல் நிரப்பி, தீ வைத்து வாகனங்கள் மீது வீசப்பட்டிருப்பது தெரியவந்தது.

ஒரு கார், 4 இருசக்கர வாகனங்கள் சேதம்

இந்தத் தீ விபத்தில் புஷ்பா நகரைச் சேர்ந்த வெங்கடேசன் என்பவருக்குச் சொந்தமான கார் தீக்கிரையானது. இவர் திமுக வழக்கறிஞர் பிரிவின் பகுதி அமைப்பாளராக இருப்பதாகக் கூறப்படுகிறது.

மேலும், அதே பகுதியைச் சேர்ந்த காமேஷ் கண்ணன் என்பவருக்குச் சொந்தமான இருசக்கர வாகனமும் சேதமடைந்தது. மொத்தம் ஒரு கார் மற்றும் 4 இருசக்கர வாகனங்கள் இந்தச் சம்பவத்தில் சேதமடைந்துள்ளதாகத் தெரிவிக்கப்பட்டுள்ளது.

இதையடுத்து போலீஸார் அப்பகுதியில் பொருத்தப்பட்டிருந்த கண்காணிப்பு கேமராக்களின் பதிவுகளை ஆய்வு செய்து விசாரணையைத் தீவிரப்படுத்தினர்.

மாணவிகளைப் பார்க்க வந்த இளைஞர்கள்: கண்டித்ததால் மோதல்

போலீஸாரின் முதற்கட்ட விசாரணையில், புஷ்பா நகரில் வசிக்கும் இரண்டு மாணவிகளைப் பார்ப்பதற்காக அவர்களது ஆண் நண்பர்கள் கடந்த சில நாட்களாக வந்து சென்றதாகக் கூறப்படுகிறது.

இதனைப் பார்த்த அப்பகுதி மக்கள் சிலர் அந்த இளைஞர்களைக் கண்டித்ததாகவும், இதனால் ஆத்திரமடைந்த இளைஞர்கள் பெட்ரோல் நிரப்பிய பாட்டில்களை வாகனங்கள் மீது வீசியதாகவும் போலீஸார் விசாரணையில் தெரிவித்துள்ளனர்.

பெட்ரோல் குண்டு வீச்சு சம்பவம்: 5 பேர் கைது

இந்தச் சம்பவம் தொடர்பாக மதுரவாயலைச் சேர்ந்த சுரஜ் (20), அசோக் நகரைச் சேர்ந்த முகுந்தன் (19), ஆதிஷ் (19), கோடம்பாக்கம் பகுதியைச் சேர்ந்த 17 வயதுடைய இரண்டு சிறுவர்கள் என மொத்தம் 5 பேரை போலீஸார் கைது செய்துள்ளனர்.

கைது செய்யப்பட்டவர்களிடம் தொடர்ந்து விசாரணை நடைபெற்று வருகிறது. நுங்கம்பாக்கம் பகுதியில் நடைபெற்ற இந்த பெட்ரோல் குண்டு வீச்சு சம்பவம் அப்பகுதி மக்களிடையே அச்சத்தையும் பரபரப்பையும் ஏற்படுத்தியுள்ளது.

பெட்ரோல் குண்டு வீச்சு சம்பவத்திற்கு கண்டனம்

இதற்கிடையே, வி தி லீடர்ஸ் இயக்கத்தின் மக்கள் தொடர்புப் பொதுச் செயலாளர் கே. சுவாமிநாதன் வெளியிட்டுள்ள அறிக்கையில், தலைநகரின் மையப்பகுதியான நுங்கம்பாக்கத்தில் பெட்ரோல் குண்டு வீசப்பட்டதாக வெளியாகியுள்ள செய்தி அதிர்ச்சியளிப்பதாகக் குறிப்பிட்டுள்ளார்.

மேலும், இந்தச் சம்பவத்தில் தொடர்புடைய குற்றவாளிகள் யாராக இருந்தாலும் அவர்களை உடனடியாகக் கண்டறிந்து கடுமையான நடவடிக்கை எடுக்க வேண்டும் என்றும் அவர் வலியுறுத்தியுள்ளார்.