போதைப்பொருள் விற்பனையில் ஈடுபட்ட 77 பேர் சிக்கினர் – கொலை உள்ளிட்ட வழக்குகளில் 167 பேர் கைது; போக்குவரத்து விதிமீறல்கள் தொடர்பாக ஆயிரக்கணக்கான வழக்குகள் பதிவு

சென்னை: தமிழகத்தில் சட்டம் – ஒழுங்கைப் பாதுகாக்கவும், குற்றச் சம்பவங்களைக் கட்டுப்படுத்தவும் தமிழக காவல்துறை சார்பில் நவம்பர் 9, 10 ஆகிய தேதிகளில் 48 மணி நேர மாநிலம் தழுவிய சிறப்பு அதிரடி சோதனை நடைபெற்றது.

இந்தச் சோதனையின்போது மாநிலம் முழுவதும் 15 ஆயிரத்திற்கும் மேற்பட்ட சந்தேக நபர்கள் கண்காணிக்கப்பட்டு விசாரிக்கப்பட்டனர். ஆயிரக்கணக்கான வாகனங்களும் சோதனை செய்யப்பட்டன.

443 சரித்திரப் பதிவேடு குற்றவாளிகள் கைது!

மாநிலம் முழுவதும் 8,626 சரித்திரப் பதிவேடு குற்றவாளிகள் கண்காணிக்கப்பட்டதில், 443 பேர் கைது செய்யப்பட்டு நீதிமன்றக் காவலுக்கு அனுப்பப்பட்டனர். மேலும், 796 தொடர் குற்றவாளிகள் மீது நன்னடத்தை நடவடிக்கைகள் மேற்கொள்ளப்பட்டன.

போதைப்பொருள் விற்பனை: 77 பேர் கைது!

போதைப்பொருள் தொடர்பான 1,624 சரித்திரப் பதிவேடு குற்றவாளிகள் கண்காணிக்கப்பட்டதில், சட்டவிரோத போதைப்பொருள் விற்பனையில் ஈடுபட்ட 77 பேர் கைது செய்யப்பட்டனர்.

கொலை உள்ளிட்ட வழக்குகளில் 167 பேர் கைது!

கொலை, கொலை முயற்சி உள்ளிட்ட கடுமையான குற்ற வழக்குகளுடன் தொடர்புடையவர்கள் மற்றும் சிறையிலிருந்து விடுவிக்கப்பட்ட முக்கியக் குற்றவாளிகள் என 2,924 பேர் கண்காணிக்கப்பட்டனர். இதன் மூலம் 163 புதிய வழக்குகள் பதிவு செய்யப்பட்டு, 167 பேர் கைது செய்யப்பட்டு நீதிமன்றக் காவலுக்கு அனுப்பப்பட்டனர்.

போக்குவரத்து விதிமீறல்: ஆயிரக்கணக்கான வழக்குகள்!

வாகனச் சோதனையின்போது மது அருந்திவிட்டு வாகனம் ஓட்டியதாக 2,865 வழக்குகளும், ஆபத்தான முறையில் வாகனம் ஓட்டியதாக 1,243 வழக்குகளும், அதிவேகமாக வாகனம் ஓட்டியதாக 998 வழக்குகளும் பதிவு செய்யப்பட்டன.

பொது இடங்களில் அத்துமீறல்: 195 பேர் கைது!

பேருந்து நிலையங்கள், வணிக வளாகங்கள் உள்ளிட்ட மக்கள் அதிகம் கூடும் இடங்களில் காவல்துறையினர் தீவிர ரோந்துப் பணியில் ஈடுபட்டனர். பொது இடங்களில் இடையூறு ஏற்படுத்தியதாக 1,859 வழக்குகள் பதிவு செய்யப்பட்டு, 195 பேர் கைது செய்யப்பட்டனர்.

நிலுவை கைது வாரண்டுகள் நிறைவேற்றம்!

முக்கியக் குற்றவாளிகள் 1,057 பேர் கண்காணிக்கப்பட்டதுடன், நீண்டகாலமாக நிலுவையில் இருந்த 73 பிணையில் வெளிவர முடியாத கைது வாரண்டுகளும் நிறைவேற்றப்பட்டன.

காவல்துறை எச்சரிக்கை!

தமிழகத்தில் சட்டம் – ஒழுங்கைப் பேணவும், சமூக அமைதியை நிலைநாட்டவும், பொதுமக்களின் பாதுகாப்பை உறுதி செய்யவும் இதுபோன்ற மாநிலம் தழுவிய சிறப்பு சோதனைகள் மற்றும் குற்றவாளிகள் மீதான கண்காணிப்பு நடவடிக்கைகள் தொடர்ந்து மேற்கொள்ளப்படும் என தமிழக காவல்துறை தெரிவித்துள்ளது.