நவம்பர் 13-ம் தேதி பள்ளிகளில் குழந்தைகள் தின விழா கோலாகலம் – கேக்குடன் வாழ்த்து அட்டைகளும் வழங்க ஏற்பாடு; முதலமைச்சர் மாணவர்களுக்கு வாழ்த்து தெரிவிக்கிறார்

சென்னை: தமிழ்நாடு முதலமைச்சர் அவர்களின் உத்தரவின்படி, குழந்தைகள் தினத்தைக் கொண்டாடும் வகையில், தமிழகம் முழுவதும் உள்ள அரசு மற்றும் அரசு உதவி பெறும் பள்ளிகளில் பயிலும் 61,84,566 மாணவர்களுக்கு கேக்குகள் வழங்க ரூ.9.27 கோடி நிதி ஒதுக்கீடு செய்யப்பட்டுள்ளது.

வரும் 2026 நவம்பர் 13-ம் தேதி அனைத்து பள்ளிகளிலும் குழந்தைகள் தின விழா சிறப்பாகக் கொண்டாடப்பட உள்ளது. இதையொட்டி, மாணவர்கள் அனைவருக்கும் கேக்குகள் மற்றும் குழந்தைகள் தின வாழ்த்து அட்டைகள் வழங்க ஏற்பாடு செய்யப்பட்டுள்ளது.

61.84 லட்சம் மாணவர்களுக்கு கேக்

தமிழகத்தில் உள்ள அரசு மற்றும் அரசு உதவி பெறும் தொடக்க, நடுநிலை, உயர்நிலை மற்றும் மேல்நிலைப் பள்ளிகளில் பயிலும் மொத்தம் 61,84,566 மாணவர்களுக்கு கேக்குகள் வழங்கப்பட உள்ளன.

இதற்காக ரூ.9.27 கோடி நிதி ஒதுக்கீடு செய்யப்பட்டு, தமிழ்நாடு நுகர்பொருள் வாணிபக் கழகம் மூலம் ஒப்பந்தப்புள்ளிகள் கோரப்பட்டன. அதன் அடிப்படையில் நான்கு பெருநிறுவனங்கள் வாயிலாக கேக்குகள் கொள்முதல் செய்யப்பட்டுள்ளன.

12 மாவட்டங்களில் இரண்டு பாக்கெட்டுகள்

மயிலாடுதுறை, சேலம், தஞ்சாவூர், மதுரை, திருவண்ணாமலை, திருச்சி, கோயம்புத்தூர், திருப்பூர், நீலகிரி, ஈரோடு, நாமக்கல் மற்றும் கரூர் ஆகிய 12 மாவட்டங்களில் பயிலும் ஒவ்வொரு மாணவருக்கும் தலா இரண்டு பாக்கெட்டுகள் வழங்கப்படும். இவற்றின் மொத்த எடை 45 கிராம் ஆகும்.

மற்ற மாவட்டங்களில் பயிலும் ஒவ்வொரு மாணவருக்கும் 45 கிராம் எடையுள்ள ஒரு கேக் பாக்கெட் வழங்கப்பட உள்ளது.

உணவுப் பாதுகாப்புத் துறை மூலம் தரப் பரிசோதனை

கேக்குகளின் தரம் மற்றும் பாதுகாப்பை உறுதி செய்ய உணவுப் பாதுகாப்புத் துறை மூலம் ஆய்வு மேற்கொள்ளப்படுகிறது.

முதன்மைக் கல்வி அலுவலர்கள், மாவட்டக் கல்வி அலுவலர்கள், வட்டாரக் கல்வி அலுவலர்கள் மற்றும் தமிழ்நாடு நுகர்பொருள் வாணிபக் கழக மண்டல மேலாளர்கள் ஒருங்கிணைந்து கேக்குகள் விநியோகப் பணிகளை மேற்கொண்டு வருகின்றனர்.

அதன்படி, 2026 நவம்பர் 10 முதல் 12-ம் தேதிக்குள் அனைத்து பள்ளிகளுக்கும் கேக்குகள் கிடைக்கும் வகையில் விநியோகம் நடைபெற்று வருகிறது. பள்ளிகளில் பெறப்படும் கேக்குகள் சுத்தமாகவும் பாதுகாப்பாகவும் பராமரிக்கப்பட வேண்டும் என அறிவுறுத்தப்பட்டுள்ளது.

மாவட்ட ஆட்சியர்கள் கண்காணிப்பு

கேக்குகள் மாணவர்களுக்கு முறையாகச் சென்றடைவதை உறுதி செய்ய மாவட்ட ஆட்சியர்கள், மாவட்ட கண்காணிப்பு அலுவலர்கள் மற்றும் சிறப்புக் கண்காணிப்புக் குழுக்கள் மூலம் விநியோகப் பணிகள் கண்காணிக்கப்பட உள்ளன.

நவம்பர் 13-ம் தேதி குழந்தைகள் தினத்தன்று பள்ளிகளில் மாணவர்கள் அனைவருக்கும் கேக்குகள் மற்றும் வாழ்த்து அட்டைகள் வழங்கப்பட்டு விழா கொண்டாடப்பட உள்ளது.

மேலும், தமிழ்நாடு முதலமைச்சர் அவர்களும் அன்றைய தினம் மாணவர்களுக்கு கேக்குகள் மற்றும் வாழ்த்து அட்டைகளை வழங்கி குழந்தைகள் தின வாழ்த்துகளைத் தெரிவிக்க உள்ளார்.