சீனாவின் குவாங்டாங் மாகாணத்தில் உள்ள ஷென்சென் ஷுய்பெய் நகரில், ஒரு இளம்பெண் 1 கிலோ தங்கக் கடாயில் சமையல் செய்த வீடியோ சமூகவலைதளங்களில் வைரலாக பரவி வருகிறது. தங்க நகை விற்பனை மையம் ஷென்சென் ஷுய்பெய் நகரம், சீனாவின் 3-வது பெரிய நகரமாக விளங்குவதுடன், மிகப்பெரிய தங்க விற்பனை மையமாக செயல்படுகிறது. அங்கு சுமார் 20,000-க்கும் மேற்பட்ட சிறிய தங்க நகை விற்பனை சந்தைகள் இயங்குகின்றன. சீனாவில் விற்பனையாகும் தங்க நகைகளில் 50% ஷுய்பெய் நகரில் உற்பத்தி செய்யப்பட்டவை. தங்கக் கடாயில் சமையல் – வைரலான வீடியோ இந்த நகரில் ஷுய்பே புபு என்ற இளம்பெண் நகைக் கடை உரிமையாளர். தனது கடையில் தங்க ஆபரணங்களுடன், தங்கத்தால் ஆன சமையல் பாத்திரங்களும் விற்பனை செய்கிறார். அண்மையில், ஒரு வாடிக்கையாளருக்காக தயாரிக்கப்பட்ட 1 கிலோ தங்கக் கடாயில் சமைத்து, சாப்பிட்ட வீடியோவை அவர் வெளியிட்டார். இதுகுறித்து ஷுய்பே புபு கூறியதாவது: “ஒரு வாடிக்கையாளருக்காக 1 கிலோ தங்கத்தில் கடாய் தயாரித்தோம். இதன் மதிப்பு 1 லட்சம் அமெரிக்க டாலர் (இந்திய மதிப்பில் ₹87 லட்சம்). இரும்பு, அலுமினியம் கடாயைவிட தங்கக் கடாயில் வேகமாக சமையல் செய்ய முடியும். வாடிக்கையாளரின் அனுமதி பெற்று, நானே சமையல் செய்து பார்த்தேன். சுவையில் எந்த வித்தியாசமும் இல்லை. இப்போது பலரும் இவ்வகை தங்கக் கடாயை முன்பதிவு செய்து வருகின்றனர்.” சர்வதேச வர்த்தக நிபுணர்கள் கருத்து
சர்வதேச வர்த்தக நிபுணர்கள் இதுகுறித்து கருத்து தெரிவிக்கையில், ஷென்சென் ஷுய்பெய் நகரம் சீனாவின் தங்க நகை உற்பத்தியின் தலைநகராக விளங்குவதாக தெரிவித்தனர். கடந்த சில ஆண்டுகளாக இந்த நகரை உலகளவில் பிரபலப்படுத்த தீவிர முயற்சிகள் மேற்கொள்ளப்பட்டு வருகின்றன. நூதன விளம்பர உத்திகளின் ஒரு பகுதியாக, தங்கக் கடாயில் சமையல் செய்த வீடியோவும் முக்கியமானது. இந்த வீடியோ உலகம் முழுவதும் வைரலாகி, ஷென்சென் ஷுய்பெய் நகரத்தின் தனித்துவத்தையும், அங்கு நடைபெறும் தங்க வியாபாரத்தின் மகத்துவத்தையும் உலகுக்கு எடுத்துக்காட்டுகிறது.